Toi fartuca

Ya i lo dixe lutru día al mio Pepe: toi hasta per debaxo el refaxu desa xente tan fanfarrona que lluego nun tienen onde cayese muertos. ¿Qué a qué vién isti cuintu? Pues muy fácil: pol oveya del mio sienro, que tá como un cencirru. Nun sé si vos alcordaréis que va una temporá cuntevos que lu habíen chao del trabayu que tenía, según él per una reculación de empleu o algo paecío. Pero pa mi idea foi porque ye inútil total. Bueno, pues ná, la nena, la prubina, venga berrar como una descosía y catando modu per un sitiu y per utru mientras el zoquete del home taba sentéu nel sofá, como echa misma me confesó en cierta ocasión, enredando col ordeñaor y viendo carreres de coches. Per una recomendación de don Genaro, el benditu, que además de tar muy preparéu ye una bella persona, topámosi un puistu de ordenanza pa un abogáu de Uviéu que tien muncha nombradía, cobrando una paguina curiosa. Pues la selmana pasá vinieron piriquí y soltomos que ya lo había dexao, que aquecho nun yera pa él, que tinía que tar munches hores xubiendo y baxando caxes con papelones, que nun i sobraba timpu ni pa tomar un café. Cagón la güela que lu xibló. Será mastuirzanu. ¿Qué ye que nun sal almorcéu de casa? Según me diz la guaja, metese ente pechu y espalda un tazón de “Cola-Cao” hasta riba, chinu galletes. Fartón de los güevos. Meyor la hincara, que nun valda una.