Los pololos

Lutru día, el domingo paséu (o el de más patrás, nun me alcuerdo bien; ye igual), vinieron piriquí la mio nena y el sienro. Bueno, por Dios y por tos los santos del santoral xuntos, en cuanto ví aquecho nun vos cuento más que punseme hasta colorá como un pimintu morrón del apuru que me dio. Apease del coche la guaja y trayía un vestidín de rasu, muy finín, que la facía como una muñecona. Lluego posase él, que había tao rabilando un retu col pitorro del parabrís, porque decía que nun i xubía bien (como lo otro, pa mi idea), y ¡ay la Virxen y el Ninu! Si me pinchen naquel momentu paezme que nun sangro. Una cosa ye dicívoslo aquí, en frío, y otra cosa muy destinta ye mirar paquecha ayaferia de paisano, con unos pololos tan sumamente curtios que a la menor descuidá taben abonaos pa sacar un güivu pela entrepierna. Paecía la gocha.

Nun maguanté y dixei que si creyía que yera un mocecu pa andar de eses traces. Pero, ay amigu, él nunca da el brezu a torcer y si se empeña en que ye blanco, aunque sea más negro quel carbón, tién que ser como la nieve. Per aquecha bocona de oveya que tien soltome que si toi chapá a la antigua, que si agora chevase “la moda esprot” (toi na cuenta de que lo chamó ansina) a toes les edaes, que si hay que dir cómodu pela vida... Un repertoriu del demoniu. Al mio Pepe punsoi la mollera choca y namás que se i arregló coló camín del chigre cola desculpa de catar a Marcelo el de los esgonciaos y pagai un sacu de químico que i traxo va poco de La Pola.

Foi entoncenes, aprovechando que la fía había dio a mexiar al retrete, cuando i canté a isi mastuirzanu to lo que tenía en pepu dende va timpu. Empecé chamandoi mariposón y pa demostrailo dixei que chevaba caséu una temporá enorme y que nun había sio capaz de fabricame ni un nietín ni una nietina. Lluego yantei al focicu que esos pantalones recortaos, per muy modernos que sean, tan fechos pa rapaces con unes pates curioses y no pa homes con canilles de xilgueru, como él. Y pa rematar la faena, en plenu encaloramientu, espetei que ya taba bien de venir al puiblu coles manos colgando, fartase como un xabalín y panriba rebatir to lo que diz una. Nun me rechistó ni una migaya. Si me reburdia lo más mínimo apretoi cola vara ablenu unes buenes verdiscaes nos muslitos de cangreju que tien y dexoilos como la espalda dun nazarenu en penitencia de Semana Santa. Xurovoslo per mio madre, que en paz estea. Salú pa tos, que depués de to ye lo que val.