La xente de bien

La selmana pasá vieno piriquí la fía col mastuirzanu que tién per home y empeñáronse en que como taba tan buen timpu que había que baxar a pasar el día pela marina. Tanto me dieron la murga con que tinía que ser que preparé una tortiella como un venu, agarré del sombrao una vuelta chorizu pistonuda y colamos camín de Xivares. El mio Pepe dixo que nanai, que él tinía nun sé cuánto que facer per Les Meruxales y que había daoi pallabra a Colasón el de los aformigaos de que pela terde diba con él a zarrar una xebe pal sucu El Castichu. Nel fondu ye que nun i apitecía ni una migaya aguantar al sintraza que mos cató la guaja pa sienro. Pero una como tién bazu bastante fizo de tripes corazón y hale, con la nena y isi oveya de viaxe.

Oyes, lo que se diz la arena taba como un formiguiru. Pa dar un pasu teníes que brincar percima les toballes y cuando nun te salía un mocecu que te aventaba un caldiru de agua frío pel chumbu apaecía utru que tropezaba col to xuanete, dexándote el pie doloríu pa un retu y con una gana de char un cagamentu al altu la cheva que pa qué. A mediudía dixe que hasta achí habíamos chegao, que una serviora xubía pa la praera que hay percima, a esperar a que el zampaosties acabara de moyar la culera (teniais que habelu visto aventase ente les oles; yera igual que un pitu achorieu). Fui a dar un paséu pel puiblu y, ay amigu, vaya xalés más pistonudos. Eso sí que ye xente pudiente, con perres a magüeyu, y no Dolores la estirá, que pa cuatro duros que i dexó en herencia una tiona decha que morru pa la parte Valencia ponse que paez la reina de Saba. Ta comprobao que los que tienen a maza son los que menos aparenten. Ye más, les mexores cases taben medio escondies, detrás de unes talamberes enormes. Verdaderamente, si ye pa desfrutalo ún, pa qué quies que te fisgue naide. Anque tamién vos digo una cosa: serán muy guapes y tendrán munchu lujo, pero a mi dame la mia, con la antoxana, el bencu pa dexar les madreñes o les cachusques debaxo y cola cocina cheña, que tira que se mata. Ye de sobra; nun fai falta más. Lo importante ye tar a gusto. ¿Nun ye ansina? Hale, salú pa tos, que depués de to ye lo que val.