Acaramelaos como mozacos

Bueno fíos, si nun lo veo nun lo creo. Toy plasmá. Vamos, ye más, si me pinchen nun sangro. La selmana pasá apaecieron piriquí Antón el de los arrechumaos y Solmita la fervorosa, que ye una muyer que en su día vieno de pa la parte Sama y que ya tuvo casá con tres homes destintos. Eso que nosotros supiéramos. El casu ye que vilos apease dun taxis y nun corrí más tras dechos. Nun principiu pensé que lu habíen garrao ente los dos, pa pagar la mitá ca ún. Pero, ay amigu, nestes fíxome bien y veolu a él agarrala con munchu apasionamientu pela cintura, apertai una ñalga y yantai un bisu nos morros. Dioilu tan restachéu que sonó hasta per baxo el horru de Cundo el de los aformigaos. Cuando i lo cunté al mio Pepe dixome que ya había oyío él algo nel chigre de que andaben liaos, pero que nun i cho más sal al cuintu; que nun yera asuntu que i preocupara.

Home, paezme muy guapo que la xente se emparexe y que se disfrute to lo que se puea del asuntu, que pa eso tá, pero de ahí a facer esos aspavientos pel mediu la caleya, como si fueren un par de mozacos, nun me fastidies, rediós, que ca cosa tien su edá. Na mesma postura tan esa camá famoses que salen nes revistes, viviendo del cuintu. Préstame muncho engafentar al miu, que ye un sentu, el prubín, diciendoi que toy fartuca dél y que como me apure más de la cuenta que arranco con un toreru o con un ministru, pa que me saquen en primera plana toles televisiones. Al principiu tómalo a chirigota, pero al retu, si sigo ricorraco, empieza a rascase la nuca y quedase mirando pa mi, cliséu, como diciéndome con los güeyos que nun se me ocurrirá facer una atrocidá ansina. Descuida, fía. Pue tar bien tranquilu. Con él voy más que servía. Sobra paisanu.

Pal xueves que vien pienso baxar a La Pola a comprar un vistíu de inviernu, que abrigue y que me faga un tipu mexor quel de la Pantoxa. Y si depués me quieren retratar y sacar xunto a les artistes que lo fagan. Polo menos salir llucía. No como otres, que paez que les chambió un pirru. Salú pa tos, que depués de to ye lo que val.