¿Intelixencia artificial?

Lutru día taba ya medio apigazá y diome per prender la tele pa ver si chaben algo curioso y desconsonaba. Nesi momentu taba terminando el parte del mediudía. Charraben nuna noticia de que, por lo que yo pude capiscar, agora hay unos aparatos que hasta saquen les voces de xente que morrió va timpu y paez que tan vivos talmente. Ente otres munches coses que fayen. Como diz el mio Pepe, y neso tién una razón como un sentu, isti mundu cuerre demasiao y nun sé ónde vamos dir a parar con tanta modernidá. Sí, sí, tomailo a chunga, pero ya veréis cuando chegue el día nel que vayais a pidir modu a un sitiu porque te fai falta pa comer y dígante no, arrea, que nesta fábrica con un par de robots que compremos va unos meses a los americanos tamos más que apañaos. Oh Virxen, nun lo quiero ni pensar.

A una serviora, que ye más vieya que los caminos, ya i da igual ocho que ochenta, pero lo peor ye pa los que venís per detrás. Porque, o muncho mequivoco, o la intelixencia artificial esa va dexamos a dos veles y col culu al aire. Además, qué rediós, a mi dame la intelixencia de les persones y no la deses maquinones feches con tornillos y tuerques. Intelixencia de la de verdá yera la de Sindo el avispéu, que te vendía una magüeta pol doble de lo que valía y tovía i dabes les gracies pel tratu. O la de Maruja la de los aventaos, que enviudó bien xoven y sacó palantre los cuatro fíos (bien curiosos, por cierto), tres guajes y una guaja, que i dexó el botarate del so marido, que en paz estea, antes de espurrir la pata. Pa intelixencia la del mi home, que nun sé cómo se arreglaba el muy castrón cuando yeramos novios que a la menor descuidá chevábame pal maizal de Los Meruxales (tamién ye verdá que una nun se facía muncho de rogar; pa qué mos vamos a engañar).

Intelixencia foi la de don Sabino, el maestru, que mos aprendió a tos na escuela a lleer, sumar, restar, multiplicar y dividir, que ye bastante pa andar per ende ensin perdese. O si mapures la del cura, don Artemio, que Dios lu tenga na gloria bendita, que vivió como lo que yera ensin dar palu al agua, toles tardes y hasta de nuiche xugando a la baraja nel bar de Orfelina, la arremangá, y aqueridéu con Ursula la de los morcillones, que la tinía como ama de llaves y de pasu pal asuntu de ente les sábanes.

Qué pena que el mastuirzanu del mio sienro, él, que va de tan llistu, nun se hubiera namorao dun trastu desos modernos. Colo que i gusta a isi caldar la tecnoloxía y lo contintu que taría si pela mañana, al chevantase, i dixera, por exemplu, que pala parte Cuenca ta tirando un aire que cheva los paraguas o que fai un sol despatarrar. O que en Badajoz ta choviendo a cántaros (mira tú, fía, lo que mos importará nel puiblu la temperatura que tienen per ende abaxo). Polo menos hubiera dexaome en paz a lo mio nena y, quién sabe, a lo mejor echa habría topao utru muncho más afechiscu. No isi oveya, que ta como un cistu.

Bueno ná, entéreme que Velino, el fiu Segundina, para de facer isti periodiquín. To sacaba. Dame rabia, qué queréis que vos diga, pero hay que entendelu, muyer, son munchos años dale que te pego, rico raco, que si pacá y pallá. Cansó, claro. Vamos chalu de menos. Acordaivos de Josefa la de Celesta, que la tenéis piriquí pa lo que vos faga falta. Y lo que siempre vos encamiento: facei algún mocecu, demonia, que tan les cases polos chugares ensin nadie. Felices fiestes, que venga un añu buinu y salú pa tos, que depués de to ye lo que val. Un abrezu muy gurdu.