Filigranas

Nun me lo cheva el bazu ver a tos esos paisanos y muyeres que pa facese notar nun fayen namás que filigranas. Hailos de munches clases, pero son tos apaecíos. Tal ye el casu, per ponevos un exemplu muy sencillu, de Manolito el de los restayaos. Ca vez que toca una orquesta nes fiestes del puiblu dai per espetase dellantre el quioscu los músicos, enfiléu como un castrón, y chevantar los brazos parriba. De pasu, si pue goliflai les braguques a alguna de las cantantes, meyor que meyor. En cierta ocasión aventároni un caldiru de agua con eschaves desde tras y tuvo que colar pa casa a mudase. Diba empapéu como un pitu. Claro, topar topó el caldiru en suilu, pero nun supo quién foi el autor de la fechoría.

Utru que tal baila ye Ramirón el de los bartolones, que, como diz el mio Pepe, y neso tien una razón como un sentu, vién duna familia a los que yos falta una fesoriá abundante. Lo peor que i pudo pasar a isi home ye que i hubieren dao un carné de guiar, porque el día menos penséu va matase él y, lo que ye entovía más preocupante, va chevar per delantre a cualquier inocente. Dirán cuatro meses traxo un cochón enorme, que i compró a un tratante de pa la parte Xixón por cuarenta mil duros de los de antes (en euros nun sé a ciencia cierta cuánto ye). Namás chegar con él pegomos unos farrapazos y unos viraxes de la virxen. Nun vos cuento más que casi se aventa pel farfagón abaxo. Anque i tamos diciendo constantemente que tenga cuidiao, que con la carretera nun valen bromes y que se dexe de facer monigotaes, encueye los hombros y sigue erre que erre. Ta sentenciéu.

La que tamién ta como unes trebedes ye Maruxa, la sintraza. Agora dai per chevar vestíos con un escote de a metru, que un poco más i enseña les tetes a to cristo. Si ya debe andar per los setenta... Ni que fuera la Sofía Loren, rediós. Home, nun me xeringues. Pa que veais que nel mio puiblu hay algunos que trayen una raza pistonuda y que van perende nun plan que hay que chayos de comer aparte. Salú pa tos, que depués de to ye lo que val.