El murguezu

Pa los que sois de perende abaxo y andáis per ente cementu y carreteres alquitranaes lo del murguezu debe sonavos a chinu mandarín. Pero aquí ta una serviora pa explicavos detalladamente lo que ye, ensin prisa nenguna y lo que tavía ye mexor, ensin cobravos una perra. Ya lo diz el mio Pepe, nun sé si pa chungase de mi o no, que con la intelixencia que Dios me dio ye un dolor que en mio casa nun hubiera habío medios pa que yo colara del puiblu y estudiara una carrera de postín. La verdá ye que paecería yo algo con llibros debaxo el brezu o con una escuadra y un cartabón pintando rayes nuna llibreta. A mi siempre me gustó ser mélica. Como don Leandro, que va tul día col sintofanu isi colgando per delantre, visitando y recetándoyos melicines a los que tan amorrinaos. Tién que ser guapo lo de curar a la xente y ver como espochetan. Foi el casu de Cundín el aventéu, que tuvo más pallá que pacá y ahí lu tienes, tou gallasperu.

Bueno, a lo que diba, que a la mínima descuidá váseme la mollera: el murguezu son eses plantes que nacen nes güertes y que si nun les arranques cuéstate un güivu sacar les patates. Nun val pa ná. Namás que pa xeringar. Pa quitalo nun te queda utru remidiu que tirar de fesoria. Pero podemos aplicai el cuintu a más coses y ansina toparíamos muncho no que escargatar. Si mires pa les veres alcuentres murguezu hasta comelo y dexalo. Dígotelo yo.

Fíxate tú, fía, la cantidá de homes que saquen nel parte porque mataron a les muyeres. Eso tamién ye murguezu. De lo gordo. Qué se pue cuntar de los ricachones, que consienten que muerran una partía de guajes del demoniu nos sitios del mundu nos que nun tienen ná pa comer. Lo mesmo. Y los terroristes, que maten a sangre fría, pegandoi un tiru a un probe simplemente porque nun piensa igual que echos. No, sí mos punsiéramos a chevar puxarra per delantre nun hay mengu de palote que lo resista. Colo guapo que ye querese los unos a los otros (y nun me refiero únicamente a la custión de les sábanes, que tamién) y facer el bien... Son to inxusticies, rediós. Salú pa tos, que depués de to ye lo que val.