Cultura y Turismo | LA PUYA EL RAMU

Nun echen ná que valga

  • JOSEFA LA DE CELESTA

La Voz de Lena, 01 Noviembre 2020

Tengo una gana morrocotuda de que chegue ya dafechu el buen timpu pa tar tul día aventá na antoxana, porque lo que se diz na tele nun echen na que valga, fía. Cadenes hay a magüeyu, sí, eso nun se pue negar, pero ye igual que pongas una que otra, que dan pena y dolor toes eches. Nun se salva nenguna. Si nun salen esos que se ponen de vuelta y media con cuentones, son los otros, los que viven tos xuntos y dayos lo mesmo so que arre; igual te enseñen el culu que les tetes. Va dos selmanes baxé a Muries a ver a la mio prima Sensa la morguitona, que tuvo que ingresar per un cólicu nel reñón que la dexó valdá, y dixome que aquecho yera el aburrimintu padre. Y que pancima tínía que chai perres per una ranura pa que rabilara. Vaya gastu más tuntu, madre mía.

Como diz el mio Pepe, y neso tién una razón como un sentu, isi caxón nun val namás que pa ocupar un sitiu que bien podría dar cualquier utru serviciu bastante meyor. Ye verdá. Antiguamente nun existía y tábamos tos na gloria bendita y bastante más xuníos. Si facía calor salíes a la fresca, a charrar col primiru que pasaba pela caleya de lo que se terciara. Cuando chegaba el inviernu calecías al pie el fiui hasta la hora de colar pel catre. Tabes azacaná de ferranchar tul día parriba y pabaxo y aquel sosiegu prestaba como el comer. En cambiu agora chegan el home y la muyer de trabayar fuera (polo xeneral tocayos arrimar el hombru a los dos pa poder ganar algo en traza) y lo primero que fayen ye pelease per agarrar el mandu a distancia isi. Tavía palpábalo de cerca la última vez que tuve en casa la mio guaja. Nun había ni siquiera pasao pela puerta pa dientro el zampaosties col que se casó y ya taba prendiendo esa pantallona que compraron, que yos debió costar un dineral (lluego quéxense de que nun aforren un rial). Per dicir nun dixo ni buenes terdes, anque lo que ye con una serviora ta más que cumplíu. Ye más, lo ideal sería que nun me apaeciera per dellantre. Doilu per vistu.

Otra que nun se despega de la tele ye Pepa la de los amestaos, que ta de la mañana a la nuiche clisá pa to lo que ponen. Eso sí, anda al corriente de tos los mortorios de los famosos, de que si van a char a ún de nun sé qué programa, de si aquecha ta preñá de tres meses... Vamos, lo que don José el maestru chamaba “cultura xeneral” nos tiempos nos que mos ponía escuela. Sólo que achatarrao, claro. Salú pa tos, que depués de to ye lo que val.

Comentarios

No hay comentarios

Para poder dejar sus comentarios debe estar logueado en la web. Registrarse