Cultura y Turismo | LA PUYA EL RAMU

Que cole duna jodía vez

  • JOSEFA LA DE CELESTA

La Voz de Lena, 01 Noviembre 2020

Menos mal que ya tamos a pique char el remu a isti añu tan sumamente guchu. Per un llau, tamién ye verdá, el timpu cuerre que se mata. Paez que foi achir cuando mos taben dando les campanaes pela tele dende la puerta el sol de Madrid, tos tan bien vestíos y con copes de sidra achampaná na mano, deseándomos que el 2020 fuera buinu. Y mira como mos salú el muy castrón. A mi particularmente supliome una barbaridá. Nun sé si foi porque mos tuvieron apresaos en casa una temporá tan grande, per culpa disi virus dañín que chevó pal utru barriu a una partía enorme de xente, o porque se vio to tan mustio, pero podíen haber dexaolu pa preu tranquilamente. Como diz el mio Pepe, y neso tién una razón como un sentu, polo menos tamos piriquí pa cuntalo.

Nun me fartucaré de aporfiar per vosotros, y agora con más motivu, pa que aprovechéis to lo que vos venga per dellantre. Como Dionisio el xaranzaina. Isi sí que la entiende, rediós. Ye un muzu trabayaor, eh, que lo cortés nun quita lo valiente, pero a la hora la xuerga nun hay hijo madre quién i ponga frenu. Nun vei xebe. En cuanto se xunta con algún que i vaya la murga (tipo Fonsón el arremangueu o Tista el de los aventaos) empieza a soltar risotaes, cola boca abierta de oreya a oreya, a xingar culetinos de sidra y a pegar cantarinos, que si nun lu paren ta hasta les tantes. Tavía nun chegó a los trenta y ye xoven; en cuanto vaya pa más mayor el cuerpu ya nun i responde de la mesma manera. Eso digotelo yo. Además, como ye un rapaz curiusu y afechiscu topará alguna guayavina que i faga tilín, casarase, tendrá fíos y adiós muy buenes. Terminose lo de andar despendoléu per ende, como agora. Nun falla. Home, tamién ye cierto que los hay que nun enderechen anque yos pegues fesoriazos nel chumbu, pero son los menos. El casu, lo que vos dicía, que de la nuiche a la mañana topes unes cuantes canes terciaes pel pelu, duélente una barbaridá los cadriles al chevantate del catre y si nun se te planta un pinchezu na parte izquierda tiéneslu pa la derecha. Entós ye cuando cais na cuenta de que nun hay vuelta patrás, que lo vivío, vivío ta. Salú pa tos, que depués de to ye lo que val.

Comentarios

No hay comentarios

Para poder dejar sus comentarios debe estar logueado en la web. Registrarse