Cultura y Turismo | LA PUYA EL RAMU

A ver si isti sal buinu

  • JOSEFA LA DE CELESTA

La Voz de Lena, 01 Noviembre 2020

Yo namás pido que isti 2021 que entama agora sea bastante meyor quel que dexamos patrás, que, madre mía y el amor hermosu, tiníamos que haber chaolu a los gochos dende el primer menutu. Ensin contemplaciones. Home, nun me xeringues, tos metíos nes cases tantu timpu, como si tuviéramos presos, los hospitales chenos de xente enferma, vieyos morriendo nos asilos ca dos per tres… Tanta modernidá y tantu cuintu, pero de la nuiche a la mañana fabriquen un virus desos na China y cheva a media humanidá per dellantre. Tamos guapos. Si ye to esto lo que avanzamos, a mi dame lo antiguo. Pero bueno, fíos, eso ye agua pasá y hay que facer de tripes corazón pa sacar la allegría de ca ún, que esta vida dura un suspiru y hay que exprimii tol xugu que se puea. Como diz el mio Pepe, y neso tien una razón como un sentu, andando amurmiaos nun vamos a nengún sitiu. Ye verdá.

Mira, una que ye un exemplu a calcar ye Sinforosa la sandonguera. Onde ta echa ta la xarana. Tavía macuerdo cuando mos xuntábamos debaxo el horru de Rosario la de los caciplones a xugar a la llotería los sábados pela terde. Oh Virxen, qué comedies. Cuntábamos que si el home yera más bien aposentéu ente les sábanes, que daba la midía raspando y que nun sexplicaba cómo la había preñao per dos veces con aquel manguitu tan curtiu. Pa mexaxe, porque panriba terciaba na conversación Aurora la simplona, que ta afervioyá del to, y saltaba con que el suyu, Ramonzón el escusu, tien un palote morrocotudu ente les pates y que ca vez que i apitez lasuntu que i dexa el cusu como una güerta recién sachá. Sin embargu ta Felisa la de los dolientes que ye el extremu opuistu. Si te garra pela caleya nun te dexa colar, chenándote la mollera de mortorios: que si un primu que vive nun sé aonde ta muy melu, el prubín; que si a echa dueli una barbaridá pal costéu derichu y que nun pinta ná bien… To ansina. Ofiende a les piedres. Quiá. A mi dame murga, xuntase pa una fartura pistonuda o pa char unos cantarinos, como Chuchu el coraleru, que les sabe toes de memoria de principiu a fin. O pa baichar unes pieces a la gaita y el tambor. Eso ye vivir y no trayer les penes pegaes al chumbu tul día. Asique quedáis bien encamentaos de lo que hay que facer, con que si vos tropiezo perende atristayaos apúrrovos una pescozá, pa que espabileis. Feliz y prósperu añu y salú pa tos, que depués de to ye lo que val.

Comentarios

No hay comentarios

Para poder dejar sus comentarios debe estar logueado en la web. Registrarse